مبدأيا، دي محاولة للأمر بالمعروف والنهي عن المنكر.

كل أسبوعين تلاتة أسمع إن واحدة خلعت الحجاب، وفي أسبوع منهم سمعت عن ٣ خلعوا الحجاب.. وموضوع "البنات بقت تقلع الحجاب" ده بقى منتشر.

وابتدا يبقى في كلام واتهامات للبنات والمجتمع إن الدين بيقل، ومناقشات - أحيانا حادة - بين المؤيدين للحجاب والرافضين ليه

السؤال بقى، ليه الموضوع قالب دراما كده؟

أولا، هتكلم عنه بإسمه الدارج في عصرنا "الحجاب" ومش هدخل في مناقشة بيزنطية - محببة إلى نفسي الحقيقة - عن مسألة اللغة والمصطلحات في الزي الإسلامي

قبل ما أتحجب، كنت لبست وقلعت الحجاب ١٠٠ مرة.. بجد. يعني النهاردة برد ألبسه، النهارده حر أقلعه، النهاردة الإيشارب ده لايق على لبسي ألبسه، النهارده عندنا خروجة أقلعه، وكنت معتبرة نفسي "محجبة" خلاص، ما أنا "لبست الحجاب".. بشكل يومي وأسبوعي كنت أقلع وألبس الحجاب. ولا حد كان مركز معايا وبيراقب أنا بلبس إيه وبقلع إيه، ولا عمري سمعت كلمة "إنتي قلعتي الحجاب؟؟" ولا "إنتي لبستي الحجاب؟؟" ولا حاجة خالص. وحاليا عندي القدرة إني أقدر أفضل لبساه كل يوم

أهو الحجاب بالظبط هو ده حجمه، زي ما بنت صغيرة كانت بتلبسه وتقلعه من غير ما حد يعلق أو يستفسر أو يتصعب عليه أو يربطه بتصرفاتها وأخلاقها.

احنا بقى مابنعملش كده للأسف مع الحجاب. مع إن مثلا لو حد بيصلي قدامك ركعة ومابيصليش التانية انت ما بتعلقش عليها، وأقصى حاجة بتقول في سرك "ربنا يهديه".. ولو كدب مرة مابتقطعش علاقتك بيه، ولو غش حد قدامك بتنصحه وخلاص من غير ما يترتب على ده حكم عام على شخصيته.. مع إن ترك الصلاة والكدب والغش أسوأ ألف مرة من إخفاء الشعر..

ما احنا لو حطينا الحاجات في حجمها الحقيقي، من غير ما نبص لها عبر المكبر المجتمعي اللي بيساوي الحجاب بالصلاة، ويقول للستات مش هتدخلوا الجنة من غير الحجاب، وكل ما يتكلم في درس دين يقول للراجل يصلي ويصوم ويتزكى ويحج، ويقول للست إلبسي الحجاب.. لما بقت الست الكويسة هي الحجاب والحجاب هو الست الكويسة.. لحد ما بقينا مجتمع بيلخص كائن كامل بكل ميزاته وعيوبه وقدراته وهفواته وجرائمه في فعل واحد!

اتعلمت أكون أهم من حجابي..

ما هو كمان، الحياة امتحان أصلا، واحنا هنا بطول عمرنا في اختبار، وشد وجذب.. وقوة وضعف، ولين وشدة، وتراخي وعزم.. دي العلاقة بين العبد وربه، سيبوا الناس بقى تعيش العلاقة دي زي ما هي عايزة وزي ما هي قادرة، الطرف التاني - ربنا - أكبر وأعلم مني ومنك بالعلاقة اللي بينهم وبتفاصيلها ومبرراتها ومرجعياتها، ربنا أعلم بقلوب وعقول الناس وطريقة تفكيرهم وخلفياتهم الاجتماعية والثقافية وقدراتهم وميولهم، ربنا خلقنا مختلفين ودي سنته وحكمته، ربنا عارف القلوب وانت مش عارف، ربنا عارف فلانة اللي محجبة دي أقرب له من فلانة اللي مش محجبة وللا العكس، إنت مش عارف.. بجد يعني، احساسك إيه لما تبص لواحدة مش محجبة من فوق لتحت وهي عند الله أحب وأقرب منك؟

في بنات بتقلع الحجاب عشان بعد قرايتها واطلاعها اقتنعت إن الحجاب مش فرض. تفتكر من المنطقي ساعتها إنها تلبسه عشان المجتمع بتاعها مقتنع إن الحجاب فرض، وتعصي قلبها وقناعتها اللي ربنا أصلا هيحاسبها عليهم وعلى نيتها؟ يرضيك تلعب دور المرائية عشان ترضي المجتمع؟؟ حلو الغش والخداع!!

لما واحدة تقرر تكدب على المجتمع عشان ترضيه فهي بتكدب على نفسها والأهم هي بتكدب على ربنا، وفي الآخر بنلاقي نفسنا عايشين في مجتمع مريض بأخلاقه مش بمظهره.

بلاش، في بنات بتقلع الحجاب وهي مقتنعة بإنه فرض بس مش قادرة حاليا تلتزم بهذا الفرض، ليه حضرتك تيجي تنكد عليها وتكسر في مقاديفها وتسمعها كلام يؤلمها؟ وتحسسها إنها خرجت من الملة وإن مالوش لزمة الصلاة اللي بتصليها والمعاملة الحلوة اللي بتعاملها للناس لأن مابقاش منها رجا وربنا مش هيتقبلها في عباده الصالحين؟!! أرجع وأقول ليه أصلا تتدخل في علاقتها بربنا؟

مع الأسف، في بنات غير محجبات بشعر أحيانا إنهم بيحاولوا يظهروا إلتزامهم الديني "صلاة - صوم - .." عشان الناس ماتعلمش عليهم لمجرد إنهم غير محجبات.. ما ده بردو بيحط عليهم ضغط ومجهود مافيش داعي منه، وبيأثر - إن لم يكن يشوه - العلاقة بينها وبين ربها للي بتصلي له وبتصوم له.

والنبي، وحياة أبوكو، ابعدوا عن علاقة الناس بربها، سيبوهم يعبدوه على قد ما يقدروا، سيبوهم يبعدوا ويقربوا ويحتاروا ويرجعوا.. سيبوهم في كل لحظة يكونوا صادقين مع نفسهم وفي كل مرحلة من العلاقة أمناء غير مخادعين، عشان لو قبضت أرواحهم ربنا هيحاسبهم على نياتهم .. ساعدوهم تفضل نياتهم طيبة.

وكله كوم بقى، وإنك تقرر تشتغل أو تعين أو تساعد واحدة بناءا على هي محجبة وللا مش محجبة.. هتروح من ربنا فين وإنت قررت تحاسب مكان ربنا وتحكم على الناس وتجزي كمان.

وكمان الرجالة اللي معتبرين حجاب زوجاتهم مسئوليتهم الشخصية، ويقرر إنه "هيحجب" خطيبته لما يتجوزها، على أساس إنها رجل كرسي. "حبيبتي أنا عامل لك مفاجأة جوازنا دستة إيشاربات من تاي شوب"

نرجع لجزئية انتشار خلع الحجاب اليومين دول. عادي يعني، شىء متوقع، رد فعل إنساني وطبيعي في مجتمع مفتوح بعد ثورة - دي حاجة حلوة على فكرة - ابتدت ثقته تتهز في رموز إسلامية وحركات إسلامية - بسبب حركاتهم النص كم - وده طبعا هينعكس بشكل مباشر على شريحة من الناس الحجاب بالنسبة لها إلتزام اجتماعي، أو حتى رمز لتوجه ديني مابقوش مقتنعين بيه.. أيوة هي دي الحقيقة، تصرفات الحركات الإسلامية في مصر هتكون السبب في إما للأسف رفض ناس كتير للدين ككل، أو اللجوء لرفض الشكليات اللي في الدين لأنها بترتبط بالمظهر الشكلي للحركات الإسلامية المرفوضة دي والتعويض عنها باللجوء لكل ما هو ليس شكلي في الدين (ودي حاجة إيجابية - بس هتكون أندر من الفرض الأول لأننا مجتمع مشوه بالأساس)

من كل قلبي بتمنى المجتمع يفضل مفتوح ويزيد انفتاحا، ميبقاش فيه تيار مسيطر.. فرصتنا نتعلم تقبل الآخر، فرصتنا نراجع أفكارنا واللي اعتبرناه مسلمات، فرصتنا نتعلم احترام حكمة ربنا في اختلافنا، فرصتنا نرتبط بربنا عشان بنحبه مش عشان المجتمع عايز كده.

والخلاصة، المرأة كائن أجمل وأروع وأكثر عمقا وتعقيدا من إنه يتلخص في "أصلها مش محجبة!" أو "أصلها محجبة!".

وليه متكونش اجمل واجمل بحجابها
(وبعدين حجم الحجاب اللي بتتكلمي عليه هو (انه زينة المرأه وجمالها
وكمان اختي لو لم تعيني اخواتك على الحق فلا تشجعينهم على الباطل

بس النصيحة شيء لابد منه يا سالى ومينفعش واحدة تقلع الحجاب لمجرد ن الحركات الاسلامية مخطئة في السياسة او لها مواقف مش بنتفق معاها ايه ده معناه ان المحجبة مكنتش لابسة الحجاب عن اقتناع اساسا وبتلاقي اي حجة لخلعه لا اكثر ولا اقل .... انا واحدة مش بحكم عل البنت من خلال لبسها وبعدين المشكلة مش مع اللي ممكن تقلع الحجاب المشكلة الاكبر في ان اللي تقلع الحجاب تبرر ده دينيا هي عايزة تقلعه هي حرة وانا هحترمها مفيش شك بس ليه تبرره دينيا ما ممكن تخلعه وخلاص ملوش لازمة بقى نقول ان الحجاب مش فرض هي مش هتستفاد حاجة لما تقول كدة ولكن هي حرة مش هنمسك لسان حد ربنا يهدينا جميعا