بت اقعلي الحجاب ....!!!!
ما تنهوها كده وخلاص لسه هتوجعوا قلبنا الدنيا كلها مقلوبة علشان الحجاب ويقولك فرض مش فرض علي اساس اننا ناس متدينة ووقفنا علي الحتة دي وبس ...يا عم فرض و لا مش فرض انت مالك ما تخليك في حالك بما انك لا بتعمل بالفرض ولا بالسنه ...!!وتلاقي عاهات لا بتفهم في الدين ولا الدنيا وبتتكلم ع اللي ملهاش فيه وتلاقي الست من دول اخرها تقف في المطبخ او تقعد مع اصحابها في النادي وتنم علي امة لا اله الا الله وبتتكلم في الدين وتقولك ربنا مقالش عليه علي فكرة مبروك لرانيا علواني انها قلعت الحجاب الناس المحجبة دي عايشين ازاي دول مش بني ادمين واو وهبل في الجبل عادي وتلاقي الواد بتاع حقوق الانسان عاوز يعمل فيها دكر قدام اصحابه الاجانب والناس اللي ضد الحجاب ويقولك الحجاب ده شي فظيع وبرضه مبروك لرانيا علواني قلع الحجاب واي بنوتة لازم تقلع الحجاب وعلي فكرة مش فرض ...هو انت تعرف يعني ايه فرض وسنه ..؟؟ هو انت تعرف الضهر كام ركعة بلاش ..عارف مين اهل الكتاب اقولك حاجه مهمة جدا ...وحياة ابوك تتوكس...وتلقي واحدة عاوزة تتشهر تجيب صور البنات قبل وبعد وتقولك الف مبروك خلع الطرحة والحرية يابطلة..حريه فين هي دا مفهوم الحريه والبطوله ...؟؟؟؟ بص يا عم الحاج انت وهي فرض ولا مش فرض ملكش فيه الا بقا لو عاوز تبقى علامة في الدين واللي زيكم ربنا يهديهم عمركم ما هتكونوا كده... اقولك موضوع فرض ده مش قضيتي لاني لا انا شيخة ولا اي حاجة بس اللي اعرفه من كتاب ربنا ان الحجاب ربنا امر بيه حفاظاً علي بنات المسلمين واليهود والمسيحيين وياريت تحاول تفهم ده وياريت تفهم كمان ان ربنا مفيش حاجه اجبرك عليها وربنا قال" وقل الحق من ربكم فمن شاء فليؤمن ومن شاء فليكفر"خلاص انتهت انت حررررررررر او انتي حرة مفيش حاجة ربنا اجبرنا عليها في الاسلام .. اه والله نيجي بقا للحجاب الحجاب دا حاجة ربنا امر بيها حفاظ علي المراة وحباً فيها وحفاظا عليها ليك انت جوزها او اخوها او ابوها لقوله تعالى : ( وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلا يُبْدِينَ زِينَتَهُنَّ .. الخ بص يا سيدي ناخدها واحدة واحدة انت لو تعبت نفسك بدل الجدال اللي علي الفاضي هتعرف ان الحجاب شريعة في جميع الأديان السماوية، لا وكمان في بعض الأديان الوثنية اولاً الدين اليهودي : انت عارف ان الحجاب في اليهودية فريضة إلزامية ..!! طبعا متعرفش لان الحجاب مش فرض وبس تعالى كده بص علي اليهودية في نصوص يا كبير في التوراة نصّت على أن عقوبة المرأة المتزوجة المضيعة لعفتها يبدأ بكشف الكاهن لرأسها، ووجود هذه الإشارة بشكلها الصريح في كتابهم المقدس فيه دلالة واضحة على أن ارتداء المرأة اليهودية للحجاب يُعدّ مقياساً لشرفها، كما أن كشف رأسها يُعدّ من علامات فسادها.وقد أشار موسى بن ميمون الحبر اليهودي للأمور التي تخرج المرأة اليهودية من ديانتها لما قال "لو أنها خرجت إلى السوق وشعر رأسها مكشوف" طب عارف الحاخام (مناحم براير) في كتابه (المرأة اليهودية في الأدب الحاخامي): "إن القانون الحاخامي اليهودي يمنع إلقاء الأدعية أو الصلوات في وجود امرأة متزوجة حاسرة الرأس، وملعون الرجل الذي يترك شعر زوجته مكشوفاً". طبعا انت متعرفش الكلام ده لان الحجاب الاسلامي مش فرض اقولك فكك من اليهود خاينا في اولاد الوطن الواحد اخواتنا المسيحيين ومش هدخل في الدين المسيحي أوي بس خليني سطحية زيك شوية وهركز معاكم علي جزء بسيط في الدين المسيحي وكان فيه تاكيد علي أن غطاء الرأس أمر ضروري أيضا حسب الديانة المسيحية ودا جه في رسالة بولس الرسول الأولى إلى أهل كورنثوس من العهد الجديد، ودا جه في الإصحاح الحادي عشر في الفقرات من 3 إلى 10 ما يلي: "أُريدُ أنْ تَعرِفوا أنَّ المَسيحَ رأْسُ الرَّجُلِ، والرَّجُلَ رأْسُ المرأةِ، والله رأْسُ المَسيحِ. فكُلُّ رَجُلٍ يُصَلي أو يَتَنَبَّأُ وهوَ مُغَطَّى الرّأْسِ يُهينُ رأْسَهُ، أيِ المَسيحَ، وكُلُّ اَمرأةٍ تُصلي أو تَتَنبَّأُ وهِـيَ مَكشوفَةُ الرّأْسِ تُهينُ رأْسَها، أيِ الرَّجُلَ، كما لَو كانَت مَحلوقَةَ الشَّعرِ. وإذا كانَتِ المرأةُ لا تُغَطِّي رأْسَها، فأَولى بِها أنْ تَقُصَ شَعرَها، .....الي الخ (I Corinthians 11:3-10) شوفت بقى ان الحجاب امر من ربنا في جميع الديانات ليه بقى لان ربنا عاوز يحافظ علي الست الجميلة دي اللي هو خلقها من ضلعك ان ربنا عاوز يحافظ علي الست الجميلة اللي انت بتهينها كل يوم ومش عارف قيمتها . الدين المسيحي واليهودي في الحجاب بس مش الحجاب اللي انتم شايفينه ده لالالا الحجاب اللي نص كوم ده ليه اغراض تانية يعني مثلا البنوته عاوزة تتجوز او شكلها قرد حصاوي او عارفه ان الولد المصري مش هيتجوز غير بنت ملتزمه او نص علي حسب عقليه اللي خلفوه فلازم تضحك عليه يعني فتلقيها لبسه حجاب من فوق ومن تحت سما المصري عادي او لبسه حجاب بتاع البت المجنونه اللي اسمها سالي سليمان اللي للاسف كتير من البنات بتقلدها ومش عارفين ان شغلها كدا تعمل دعايه لمحلات الاشاربات تحت مسمي حجاب لا وتقولك موضة موضه ايه الله يحرقك يا شيخه ده فيه بنات محجبة واشيك من كل الدنيا بحجابها وزي كمان البنت اللي لابسة الحجاب وتلاقي الضحكة ايه الصلاة علي النبي تفضل تسأل نفسك انا ايه اللي جبني شارع الهرم طب دي سما المصري بعد الحجاب ولا صافيناز الحجاب اللي انتم بتحاربوه صدقوني لا انتم ولا كل الدنيا هتقدروا علي اصحابه لانهم عارفين كويس يعني ايه حجاب وعارفين كويس امتى يلبسوه ولما قرروا يلبسوه مكانش علشان أي غرض غير لله الناس دي تعرف في الحجاب أكتر منكم وتعرف امتى توقف امثالكم عند حدهم وتعرف امتى تقول لامثالكم لا .. الا حجابي
2015-03-28, 10:49 am
