لسلام عليكم، أحب أهنيكم وأشكركم على الموقع الرائع ده، أنا مشكلتي زي معظم البنات - الحب- أنا عندي 17سنة وحبيت مرتين ودلوقتي التالتة، كتير بأقول إزاي؟! بس ده اللي بيحصل.
المرة دي أنا ما كنتش ناوية أحب بس اللي حصل إن إحنا كنا أصحاب وقال لي إنه بيحبني، هو شاب زي القمر وأي واحدة تتمنى يكلمها، وهو بيعمل كتير عشاني؛ بس فيه حاجات كتير بتخليني ما اقبلش نكون غير أصحاب؛ منها إن هو عنده إخوات بنات، وباخاف يفكر إني قليلة أدب عشان كده قبلت نكون أكتر من أصحاب، بافضل أقول لنفسي أنا ليه أقبل حاجة على نفسي هو ما يقبلهاش على أخته ويفكر فيّ تفكير وحش.
إحنا السنة دي ثانوية عامة، وخايفة نسيب بعض وده يؤثر على دراستنا، وكمان هو ما شافنيش قبل كده؛ بس الصراحة إحنا بنحب بعض أوي، وباقول: ليه الحب اللي بينا يموت وإحنا بنحب بعض؟ ما دام فيه فرصة يعيش؛ وخصوصا إن هو اتغير عشاني وأصحابه قالوا لي لو سبته مستقبله هيضيع بسببي، وأنا باخاف أقول له نكون أصحاب أحسن لأنه بيتضايق على طول وممكن لا نكون أصحاب ولا أحباب، وأنا باخاف على صداقتنا يضيّعها الحب ده. آسفة إني طولت عليكم ومستنية الرد.
2010-02-11, 11:28 am
