حصل من يومين و انا راجع من الجامعة .. كنت راكب ميكروباص بااتجاه ميدان الساعة .. و فى أول شارع النزهة .. قبل ميدان الساعة علطول .. شفت واحد أتحرش بواحدة (مد ايده و مسكها ) و مشى بعيد عنها ولا كأنه عمل حاجة .. انا أول ما شفت ده وقفت الميكروباص و نزلت و عديت الشارع و مسكت فى الولد .. فى نفس الوقت سواق تاكسى كان معدى شاف نفس الموقف حجز على الولد و نزل ..
البنت : (كانت فى الأول مصدومة ، مش عارفه حتى تصوت .. بس لما لقيتنا ماسكين الولد و مكتفينه أنفجرت .. جريت عليه و قعدت تضرب فيه بالاقلام و هيه فى حالة أنهيار)
الناس : (ناس كتير أتلمت و لما عرفوا ان الموضوع تحرش عملوا الواجب مع الولد .. مما يدل ان فى ناس كتير شايلين من الموضوع ده .. و الشئ المؤسف ان فى ناس كتير خصوصا البنات كانوا بيحاولوا يقنعوا البنت انها خلاص خدت حقها منه ضرب و ملوش لزوم تعمل محضر.)
المتحرش : ( تحول سريعا من دور البلطجى الى دور الغلبان و حاول بأى طريقة ممكنه أنه يعتذر للبنت اللى طبعا مكانتش طايقة تبص فى وشه .. و الجدير بالذكر ان المتحرش طلع متجوز و مخلف !! ..يعنى مش محروم لمن يبرر التحرش على أساس الحرمان .. أكل ضرب لحد ما شبع مع أن ماكانش محوق فيه من البرشام اللى واخده )
النجدة : (قعدت ما لا يقل عن 20 دقيقة بس بحاول اوصل للنجده !! .. كل مرة يقول لا يوجد أحد متاح للرد عليك .. معرفش أزاى .. المهم الشرطة جت بعد ما تطوع واحد من الواقفين و راح جاب كام ظابط من القسم اللى ميبعدش 5 دقائق مستخدما سيارته الشخصية )
القسم : (بصراحه عملوا معاه الواجب ، و كعادة أقسامنا تم أستقباله بوابل من الأقلام و الشلاليط مع الشتايم .. بعد كدة دخلوه الحجز و عملوا محضر بعد ما أخذوا أقوال الشهود (أنا و سواق التاكسى) )
دلوقتى المخلوق دة محبوس 4 ايام على زمة التحقيق .. و ينتظر عقوبة من 2 إلى 5 سنين حبس عملا بالقانون الجديد .. أنشاءالله يكونوا من نصيبه !
نداء ..
لكل بنت بيتم التحرش بيها.. لفظيا كان أو فعليا ..
متسكتيش !! .. متعديش الموضوع !!
زعقى و لمى عليه الناس .. امسكى فيه و متخفيش هتلاقى كتير وقفوا معاكى ..
متتنازليش عن حقك و تروحى بيتك مكسورة و تقعدى تبقى عايزة تضربى نفسك ميييت جزمة علشان سيبتى حقك !
عرفيهم أنك مش حاجة تتاخد بالرخيص و تعدى !
ملحوظة : انا معملتش حاجة .. و فى ناس كتير وقفوا معايا هما اللى ضربوه .. انا أخر مرة أتخانقت كنت فى أبتدائى و أتضربت smile رمز تعبيري .. من فضلكم أنشروا للتوعية فقط ..شكرا
2015-04-07, 9:39 am
