تعالوا أما أحكي لكم مارك زوكربرج صاحب الفيس بوك عامل ايه في فيس بوكه ..
من فترة طويلة عم مارك علشان يجيب رزقها وتتعشى حدد وصول البوستات للناس وقلله خالص ..
يعني احنا عندنا مثلا مليون ونص فان .. تلاقي البوست يوصل بس في البداية لنسبة أقل من ٢٪ ولما الناس تعمل شير للبوست وتتفاعل مع البوست يبدأ ناس أكثر تشوفه ..
أفخم بوست لما يكون الناس مبسوطة منه جدا بيوصل ل٢٠٪ بالكثير قوي ..
طيب هو بيعمل كده ليه ؟!
علشان لو عايزين ناس أكثر تشوف البوست ندفع فلوس ..
وكل ما تكون الصفحة أكبر كل ما تحتاج تشخشخ جيبك أكثر يا بلدينا ..
فاحنا بقينا بننشر الفيديو أكثر من مرة علشان نحاول يمكن يوصل كل مرة لناس مختلفة ..
دي كانت الأيام السعيدة بتاعة زمان خالص ..
الوضع بعد كده ازداد سوءً وبدأ يلعب في نوع البوست ..
يعني يقول لك البوست أبو صورة ينتشر أكثر من اللي فيه فيديو واللي فيه فيديو من الفيس بوك ينتشر اكثر من اللي فيه فيديو من اليوتيوب..
علشان كده بتلاقونا بننشر البوست صورة ونحط رابط الفيديو معاها بدل ما نعمل شير للفيديو على طول .
ده بردو مش جديد ..
الجديد بقى ابن زوكربرج عمل ايه ..
صحي الصبح كده من يومين قال لك ازاي الصفحات فيها ناس كثير ومش كلهم نشيطين على الصفحات ؟!!!
طبعا الإجابة المنطقية ان انت يا فكيك اللي مانع وصول البوستات لأغلب الفانز ..
لكن هو قرر بسلامته انه يعمل unlike للفانز اللي مش نشيطين .. بيعمل unlike أوتوماتيك بمزاج الست أم مارك ..
مش بس كده .. ده كمان قلل وصول البوستات زيادة وخلاها بس للفانز النشيطين ..
المشكلة ان تقريبا ٤٠٪ من المشاهدات لفيديوهاتنا بتحصل عن طريق الفيس بوك على عكس باقي الشباب ..
قدامنا حل من إثنين .. إما إننا نهريكم بوستات مالهاش لازمة ونقعد نتحايل على حضراتكم علشان تتفاعلوا وتبقوا نشيطين ..
بس ده جو رخيص جدا ..
أو إننا نفتح مجال ثاني اضافي للتواصل مع حضراتكم وفي نفس الوقت ندعم تجربة عربية جديدة ويمكن ييجي يوم نقدر نسيب موقع ابن زوكر برج خاوي على عروشه مطربقا على دماغه ودماغ الست أم مارك ..
فاخترنا الإختيار الثاني
ودورنا فلاقينا موقع جديد وله جو خاص بيه كده ..
وهو موقع jidari
امبارح أعلنا عن الموضوع ده وأخدناهم على خوانة وهجمنا ع الموقع فوقعنا السيرفر ..
المرة دي هم مستعدين للترحيب بحضراتكم وقاعدين منتظرينكم على مشارف الموقع..
رابط الموقع ورابط صفحتنا هناك (بيسموها community مش صفحة ) موجود في أول تعليق ..
2015-03-18, 4:46 pm
