- أكبر خدعة خدعها الشيطان للبشرية أنه أقنع ماجد المصرى أنه جان ودمه خفيف.
- لكل واحد عنده أمل إن مرسى يرجع تانى ماتيأسش، تامر هجرس أهه الناس كلها بتكرهه ولسه بيمثل.
- كهربنى، اخلع ضوافرى، طفى سجاير فى جسمى، بس ماتقعدنيش اتفرج على مسلسل لمصطفى شعبان.
- عارف انت العيل الرخم اللى أول ماتعدى ف الشارع يرمى صاروخ تحت رجليك ويستمتع بخضتك.. الواد لما كبر بقى رامز جلال.
- الله يرحم أيام ما كنا بنشوف يوسف الشريف وأمير كرارة وعمرو يوسف ومحمود عبد المغنى ف مسلسل واحد.
- فؤاد المهندس طلع عمل إعلان، وحزلقوم طلع أخو الكبير، يا خوفى البرادعى يطلع إخوانى فى الآخر.
- أنا مؤمن جدا جدا بالاختلاف وحرية الرأى، أنا أقول رأيى، وانت رأيك خليه لنفسك.
- رمضان خلص ولسه فيه ناس مصدومة إن هيفا بتشتم. ده على أساس أنها كانت بتقدم حديث الروح.
- قضيت نص عمرى بدور على فرد الشرابات الضايعة، والنص التانى بدور جوا ذاتى أهرماتى واللى علا السد.
-إحنا جيل فهم الفيزيا وجاب فيها درجات نهائية، ومقدرش يفهم دماغ أبوالفتوح.
- أحسن حل سلمى لفض اعتصام، ترشقوا حواليهم شاشات كبيرة ف كل حتة، وسيبوا عليهم حلقتين من فوازير محمد هنيدى.
- أنا نفسى أرجع أعيش مصر الطفولة اللى فى إعلانات بيبسى، أو أعيش مصر الحب اللى فى إعلانات كوكاكولا، إنما الحقيقة أنا عايش فى مصر المُسفة اللى فى إعلانات سينا كولا.
- بالمناسبة إعلانين كمان لكوكاكولا وحقابل مندوب كوكاكولا ف الشارع بيوقف الناس ويخليهم يبوسوا على راس بعض.
- نزل الفانوس يا طارق ورجع الكنافة، إحنا اتنصب علينا رمضان ده.
جريدة عين
2013-08-09, 1:35 pm
