مع استمرار حملة "كن إيجابياً" في التوعية السياسية؛ للتعريف بالتعديلات الدستورية اللي هنشارك في الاستفتاء عليها يوم 19 مارس الحالي.. إحنا واثقين إنك هتروح تشارك..

وطبعاً كل يوم هتقدر تبصّ وتطل على نفس المكان اللي فتحت منه الصفحة دي، وهتلاقي معلومة جديدة تنوّرك أكتر بالتعديلات الدستورية، وتقدر أنت كمان تنوّرنا بمشاركاتك ومعلوماتك..

مادة النهاردة اللي هي المادة 77 من الدستور مش هينفع نقول نصّها قبل ما نحكي تاريخها سريعاً.. كان عندنا دستور صدر يوم 11 سبتمبر 1971، وكانت المادة دي فيه بتنصّ على أن:


"مدة الرئاسة 6 سنين ميلادية، ويجوز إعادة انتخاب رئيس الجمهورية لمدة تالية ومتصلة".

لكن مع الأسف لما قدّمت فايدة كامل –عضو في البرلمان أيام السادات- باقتراح لتعديل نصها وحذف التاء المربوطة، وإضافة حرف "د"؛ فتحولت كلمة لمدة واحدة إلى مدد متصلة.. وتمّ الموافقة عليه في 22 مايو 1980.. وجاء النص الرهيب كالتالي:

"مدة الرئاسة ست سنوات ميلادية تبدأ من تاريخ إعلان نتيجة الاستفتاء، ويجوز إعادة انتخاب رئيس الجمهورية لمدد أخرى".

متخيل حجم الصدمة؟؟! المادة كانت في بدايتها منصفة وبتحدد حكم الرئيس لمدتين فقط –وإن كان كل مدة فيهم 6 سنين- ومع الأسف لما اتعدّلت باااظت.. وبكده بقى ممكن رئيس مصر يحكم أكتر ما حكم مؤسس مصر الحديثة محمد علي باشا..

من الطريف إن السادات عدّل المادة؛ لكنه اغتيل قبل أن يستفيد منها، وأكتر واحد استفاد من التعديل ده، هو الرئيس السابق مبارك اللي حكم البلد 5 مدد متتالية، يعني 30 سنة.

طبعاً زي ما إنت شايف المادة بصياغتها القديمة بتتيح للرئيس فرصة إعادة انتخابه لفترات متتالية؛ يعني هيفضل على كرسي الحكم لغاية آخر نفس يخرج منه، أو لغاية ما يحسّ –ده إذا حسّ يعني- إنه تعب ونفسه يعتزل العمل السياسي؛ لذا تعديل المادة دي بالشكل اللي اقترحه المستشار طارق البشري –رئيس اللجنة المكلّفة بتعديل الدستور- حطّت خط أحمر للرئيس الجديد، وكل من يأتون من بعده.

والآن جاء الوقت لننتقل لاقتراح اللجنة المكلّفة بتعديل الدستور تعديل هذه المادة، والذي جاء على النحو التالي:

" مدة الرئاسة 4 سنوات ميلادية تبدأ من تاريخ إعلان نتيجة الانتخابات، ويجوز إعادة انتخاب رئيس الجمهورية لمدة أخرى واحدة فقط".

التعديل بيقضي إن مدة جلوس الرئيس المنتخب الجديد على كرسي الحكم هتستمر لمدة 4 سنين، وفي حالة لو رشّح نفسه للانتخابات الرئاسية وانتخبه الشعب تاني مرة، هيكون قدامه 4 سنين تانيين وبس، ماينفعش يتجددوا لمرة تالتة، يعني كل مدة حكم الرئيس الجديد إن أعيد انتخابه هتكون 8 سنين وبس.

بعد تعديل المادة 77 في ناس كتير وافقت على التعديل، لكن الغريب إن فيه ناس كمان اعترضت.. وحصل جدل حول الاعتراض ده:

- الناس المعترضة عندهم تخوّف من أن المادة دي بعد التعديل تكون زي قفزة أعلى من المطلوب دلوقتي؛ لأن 4 سنوات مش كافية لتقييم رئيس جمهورية تولى دولة في حالة فساد وخراب اقتصادي وولادة سياسية لها من جديد.

- لكن ناس تانية ردت عليهم إن العكس صحيح، وإن بعد التعديل للمادة دي الرئيس الجديد هيشعر إن الكرسي مش دايم له؛ لأنه بعد ما يحسّ إنه مرتبط بمدة محددة هي 4 سنين أو 8 سنين هيبذل كل ما في وسعه لمحاربة الفساد وإنه يعلي من شأن المواطن وشأن البلد، وتعديل المادة بهذه الطريقة يُضيع الفرصة أمام أي رئيس قادم من الفساد أو الاستبداد بالحكم، ويعطي الفرصة لمحاسبته بعد انتهاء مدة حكمه.

- وشباب العشرينات بقى كان لهم سبب إضافي للسبب اللي فات، وهو أنهم ممكن بكده يشهدوا 10 رؤساء بحد أقصى و 5 رؤساء بحد أدنى، في حال إذا عاشوا 60 عاما وهو متوسط عمر المواطن المصري طبقا لمنظمة الصحة العالمية، واللي من المتوقع إنه يرتفع بعد ثورة 25 يناير اللي بعثت الأمل في روح كتير من الشباب!

اواااااااااااافق طبعا كفاية اوى اربع سنين ويشتغل فيهم بما يرضى الله وان شاء الله ربنا يوفقه ويعمل لأخرته ويطلع بشكل مشرف
لكن مش يطلع متهان ومكروه ومغضوب عليه ويدخل جهنم فى الاخر
اى حد او اى رئيس خايف من ربنا هايفضل انها تكون ساعة واحدة بس لانها مسؤلية جامدة ويبقوا يقرأوا تاريخ الرسول والصحابة وعمر بن الخطاب وهما يعرفوا

دا مكنش دستور .. دا كات كتاب " تعلم كيف تبقى على الكرسى " للأديب محمد حسنى مبارك .. وحاشيته


تسلم ايدك موضووع رائع