سلامتك يا أبو جمال
يا جد وخال وعم العيال
سلامة مرارتك تنشال
ربنا يخليك والعمر لك طال
وتعيش مليون سنه زى الجبال
دعايا ليك من ورا قلبى
واستر بسترك يا ستار
حمال قسيه من يومك
صاحب مرض الله في عونك
وشايل الكرسي في عيونك
تلبس وتتمنظر بهدومك
جتنا المصايب على قدومك
كام عمليه يامسكين
إشى غضروف وإشى رجلين
ولا النقرس استر يا معين
من كتر اللحمه بيعمل تخشين
فى المفاصل والركبتين
وصرفولك نقول 200!
بتوفر خايف من العين
وصبغت حتى الرمشين
أنا خايف تعمل سيليكون يا حزين
وتصبح لينا نانسي أو مادلين
رحت ألمانيا تشيل المراره
أديك مرارتى بس يا خساره
اتفقعت من الفول والبصاره
قربنا نشيط فاضل شراره
لا عاوزين مجالس ولا وزاره
أنت التاريخ ولكلامنا أماره
انت البردعة وأحنا الحماره
إركب وحركنا بإشاره
أو صفر لنا بزمارة
وارمينا فى اقرب خراره
وولع فينا بعقب سجاره
فيه سؤال موش لاقي جواب؟
ليه عملت العمليه عند أغراب؟
إحنا بصراحه فى استغراب!!
هو أنت سيد وإحنا كلاب؟
ولا الصحه فيها أنساب؟
خايف يسرقوا منك كلية؟
ولا خايف تجيلك ملاريا؟
ولا تجيلك دزنتاريه؟؟
ولا حكيم يغليك غلية؟؟
هو الطب تقدم فى ألمانيا
والصحه عندنا فاصوليه
يدوك فيزه لآخر الدنيا
يعنى الآخره تروحها في ثانيه
2010-03-29, 3:34 pm
