كم واحد فينا متخانق مع صاحبه
كم واحد فينا بيعانى ولوحده
كم واحد فينا بيدور على نفسه
الكل يقول يا الله نفسه ومصلحته

ونسينا إننا فى الحياة أغراب
رحلة سفر مكتوبه فى كتاب
ونجرح أقرب ما لينا حتى الأحباب
ونجرى على حلم كداب
ونصدق الوهم والسراب
نسينا الموت ونسينا الحساب

هناخد إيه من بعضنا
غير ذكرى حلوة تعيش لنا
حد يواسينا فى همنا
أو حتى يترحم لنا
حد يشاركنا حلمنا
قبل ما يخلص عمرنا
ونلاقى قبر يضمنا ولوحدنا

كلنا فى الحياة مرغمين
والزمن بيسرقنا طول السنين
وعمرنا يجرى بينا وكأنه يومين
كم يوم فرح يا صاحبى كم يوم حزين
ده كله مكتوب علينا و فوق الجبين
كاس داير علينا والموت هو اليقين
هندوقه زى غيرنا وغيرنا راحوا فين
ليه بنعادى بعضنا وإحنا منها مرواحين
بنصارع فيها ونجرى وكاننا مخلدين

حد فكر فينا قبل ما ينام
ممكن يموت بصمت فى المنام
وإنه يعيش فى قبر كله ظلام
ويتخرس صوته عن الكلام

يا ابن آدم افتكر لحظه وداع
أنك عابر سبيل فى دنيا الخداع
كفنك ملهوش جيوب مهما يساع

إيه هاتاخده معاك في رحلتك
ومين هيواسيك في وحدتك
عملك يا صحبى هو عزوتك
لو كان يا صحبى خير هيسعدك
وان كانت الدنيا معاها لفتك
ونسيت معها ربك وآخرتك
قول يا رب رحمتك

إحنا عايشين يا صحبى بالنفس
ممكن يدخل ما يخرج أو العكس
كل الترف فيها مايسعدكش
كل اللى فيها وبزينتها ماتنفعكش
ولو جات لحظتك ما تتأخرش
واجهز للرحيل مهما فيها عشت