العب غيرها او تشيك مايت
طرح البنك المركزى المصرى 500 مليون دولار بسعر 7.8 جنيه وبعدها باربع ايام خفض قيمه الجنيه وطرح 200 مليون دولار بالسعر الجديد والنهارده طرح 200 مليون دولار تانيين
وبغض النظر عمن استفاد من اول خمسمائه مليون دولار اللى بالسعر المخفض والناس اللى بتهرى عليها ده سلو بلدنا وياما فيه تمريرات وابداعات فى التربح الفهلوى
لكن اللى انا مهتم بيه ان المركزى كده طير 900 مليون فى اسبوع من احتياطى قدره 16 مليار فقط يعنى الاحتياطى النهارده زمانه بقى 15مليار بس وكل ده حسب ما يدعون ويهللون ان دعم لقيمه الجنيه الجديده واحداث خسائر للمضاربيين على العمله ؟؟؟ انت اهبل يابنى
المضاربيين دول ناس بتكسب وتخسر كل يوم ولا يتهز لها شعره -حياتهم كده
ومعظم الوقت بيكسبوا اكتر مابيخسروا والا خرجوا بره السوق المالى
فانت كده بتلاعب محترفيين وانت واقف على حرف البلكونه
ايوه حرف البلكونه لان عندك عجز شهرى فى الدولار قدره 4 مليار دولار
ويعنى المليار اللى حطيته فى السوق يدوب يشتريلك اسبوع واحد
وبعدها تخش الاسبوع التانى والدولار يطلع تانى او تضطر تضخ مليار تانى
من الاحتياطى اللى اصبح الان 15 مليار دولار ؟ هتعمل ايه ياخفيف
اللعبه واضحه وانت كش مللك وتثبيت السعر يكلفك مليار دولار من الاحتياطى
وانت معاك 15 مليار بس يعنى يقضوك بنفس السياسه والتفكير 15 اسبوع بس
وسلم لى على المضاربيين اللى بتقول قضيت عليهم ؟ هيكلوك زى الدياب فى فيلم دراكولا
هتعمل ايه ياخفيف
بعد 15 اسبوع جيم از اوفر او تشيك مات
ماقلنا العب غيرها من الاول لان لعبك غلط
اللهم بلغت
2016-03-17, 8:19 am
