كبرت لقتني بنت! يمكن دي حاجة حلوة أو وحشة، الله اعلم، بس هي فرض مابيتغيرش مهما اعلنت فرحتي به أو تبرمي منه.
بس اللي بيتغير هو أول ما تبتدي البنت تكبر، بتتغير نظرتهم ليكي.. من سيبها تلعب دي لسه عيلة، اللي كانت بتقولها طنط عفاف لماما، لجوزيها بقى السن بيجري.
زمان كنت فاكرة إن السن بيجري ورايا, بعد كدة اكتشفت إن أنا اللي باجري وراه.. باجري وراه عشان ألحق اعيشه.. وباجري وراه عشان ألحق افهم أنا عايشة ليه, وباجري وراه اتواصل مع اللي حواليا واندم وافكر واشتغل واتخانق واصاحب ناس جديدة واتكسر واقف على رجلي تاني واكتئب وافرح وابكي وعيني تورم من كتر البكا، كل ده وأنا باجري.
باجري، وأنا باسأل نفسي في بداية كل سنة جديدة.. في شهر يناير: هي السنة اللي فاتت حصل فيها إيه؟
احاول افتكر أي أحداث مهمة حصلت.. طب تافهة حتى! مفيش.. مش فاكرة حاجة!
فاوصل لـ: أنا ماعشتش السنة اللي فاتت، مش فاكرة قضيتها في إيه ولا حصل فيها إيه.. هتتحسب عادي؟
زي بالظبط في الامتحانات، بيشد مني المراقب الورقة لما الوقت يخلص، مهما كان الامتحان ماجاش من المنهج أو من المحذوف، وإحنا ماكناش متفقين على كده.. دايما الحياة معايا: إحنا ماكناش متفقين على كده
باحاول افرح واتنطط واتحمس، بس برضه وأنا باجري.
نفسي اخد نفسي ونبطل أنا والدنيا جري ورا بعض.. لا اسبقها ولا تسبقني.. نمشي بهوادة مع بعض.. نتصاحب وناكل آيس كريم سوا، ونحكي.
نفسي لما احب ماحبش في ست شهور، بما فيهم التعارف والفركشة.. ليه الهروله دي؟ أمال فين قصص الحب اللي بتقعد ست وتمن سنين يا جدعان؟ بطلت؟
نفسي ابطل اسمع العمر بيجري
أنتي زي الزهرة بتدبل مع العمر وتقع
أنتي زي القطر يبطل يقف على محطات لما يوصل لآخر محطة.
كأني آلة! لازم ألحق السبق.
عاوزة اعيش حاجة غير علبه تونة على الرف مستنيه صاحب نصيبها قبل مدة الصلاحيه ما تخلص وتفضل مركونة ولا تتباع بأرخص تمن.
عاوزة اتجوز واحد مايعاملنيش إني في كي جي تو ويكلمني بلهجة أطفال لو هنتناقش في حاجة أو بلهجة لازم استأذن أو اسمع الكلام.
واحد عارف إنه متجوز كائن عاقل وراشد، لو عمل حتى جريمة مخالفة لقانون ما، هيروح السجن ويتحاسب، مش هيروح الأحداث.. إنه مش محتاج يعاملني إنه لسه بيربيني، وأنا مش مضطرة اتعامل إن أيوة انا لسه باتربى فعلا.
عاوزة مشوفش في عيون الناس تأفف من واحدة ماتجوزتش وسنها عدي الأربعين، ولا حتى نظرة شفقة وياعييني ماتجوزتش.
مرة قلت: إزاي واحدة ترضى بإنها تتجوز حد جه اتفرج عليها؟
وكان الرد اللي المفروض يخرسني هو: مش لما بتشتري بلوزة بتلفي على كل المحلات!
بقينا بلوزات في المحلات! وبيلفوا ينقوا حاجة تليق مننا على جسمهم وبشرتهم!
ولو واحدة رفضت فينا واحد معاه فلوس وشقه تبقى: بتتبطر.. فاكرة نفسها مين؟ طب ما يمكن مقاسه ماجاش على مقاسها ولا غامق عليها؟ ماهو نفس المنطق
فيه كتير مننا علاقاتهم باظت بربنا بسبب الأفكار دي، إننا لسه جوه دماغ ناس كتير للاستخدام الشخصي فقط! وإن ربنا سايبنا نتمرمط ليه؟
زمان كنت متأكدة إن مفيش بنت بتتجوز غصب عنها، دي يا بتكدب وتستهبل، يا بتكدب وتستهبل.
بس اكتشفت مؤخرا إن فيه غصب غير مباشر.. غصب هنكرههك في حياتك لحد ما تهربي مننا وتروحيله.. هنزن عليكي لحد ما أنتي اللي تقولي بلسانك وحريتك المتسلسلة: موافقه جدا.
البنت وردة وقطر زي ما أنتو بتقولوا.. بس عاوزة تبقى في جنينة مليانة شمس وخضرة أو قطر بيسافر محطات كتييير.. عاوزين نعيش بهوداة من غير جري.. لا مننا ولا منكم.
2016-01-05, 10:35 am
