ساعات الواحد بتحصله ظروف تاخده من الدنيا لمده طويله .. زى مرض معين أو فقد حبيب أو صدمه قويه فى صديق .. الحاله دى بتؤدى مع طولها لإن الاكتئاب يولد اكتئاب لإن الإنسان بيقعد لمدة طويله من غير ما يشعر بأى إنجاز أو أى نجاح لدرجة إنه ربما يفقد معنى النجاح ذاته .. بمعنى أصح بينسى طعم النجاح لبُعد آخر مره نجح فيها زمنياً .. و مع فقد تخيل طعم النجاح (اللى هو الدافع للعمل) بيفقد الإنسان الدافع للعمل .. و طبعا اللى حواليه بيلوموا عليه و هو كرد فعل (خصوصا لو كان ذكى) بيبدأ يلاقى مبررات لحالة البلاده اللى هو فيها، و قد يوصل إنه يضحك على نفسه ذاتها و يبدأ يقنع نفسه بإن المبررات دى حقيقية فعلا .. ساعتها هو بيكون بيشل نفسه باختياره عشان مش عايز يتحرك و ف نفس الوقت مش عايز الناس تلومه .. طب ازاى الناس مايلوموش إنسان على إنه مش عايز يتحرك؟ لما يكون فعليا مش قادر يتحرك .. مشلول يعنى.
طب إيه الحل ؟؟
الحل من وجهة نظرى إن الإنسان ده لازم أولا: إنه يتصالح مع نفسه و يقبلها عن طريق إنه يفهم حالته كويس و يعذر نفسه .. و كمان يا سلام لو اللى حواليه قدروا يعملوا كده بس مش لازم .. ثم ثانيا: إنه يبدأ يحط لنفسه أهداف يومية بسيطه جدا و سهله جدا ينفذها فيحس بالنجاح و كل يوم يزود صعوبة الأهداف دى و ينجح فيها .. مثلا لو الإنسان ده تخين .. يقول أنا النهارده هامشى فى المكان قدام التلفزيون و انا بتفرج على فيلم بحبه 10 دقايق .. و تانى يوم يخليهم 15 دقيقة .. و تالت يوم يخليهم 20 دقيقة .. و بعد مده يبدأ ينقل النشاط ده للشارع من أول الـ 10 دقايق .. لو الإنسان ده ماعندوش مستقبل واضح ممكن يختار بينه و بين نفسه المجال اللى يحب يشتغل فيه .. و كل الكورسات متاحه على اليوتيوب .. ممكن يختار إنه يبقى مصمم فينزل برنامج الفوتوشوب و يبدأ يتابع كل يوم محاضرة من الكورس على اليوتيوب من غير ما يقول لحد و من غير مايصعبها على نفسه و يقعد يقول عشان أبقى مصمم لازم أروح مركز كورسات و أدفع فلوس و أخرج من البيت 3 أيام فى الأسبوع و هاتضطر أتعرف على ناس جديدة فى الكورس الله أعلم هايبقى شكلهم إيه و و و .. الموضوع ببساطه لازم يبقى سهل و بسيط و من غير تنشنه و لا ضغوط .. من الآخر سايس نفسك عشان تحس بالنجاح تانى و تستطعمه تانى ..و قعها فى الفخ .. و واحده بواحده المكنه هاتشتغل تانى و تطلع قماااااش.
محمد_ابو_الفتوح
2015-11-19, 2:31 am
