عارف إن فلوس الإعلانات هي مصدر التمويل الأساسي لإنتاج المسلسلات لكن وفي الوقت نفسه الطريقة اللي بيدخلوا فيها الإعلان جوه الحلقات كفيل إنه يكرهك في المسلسل والمنتج وفي نفسك .. تخيل معايا تكون قاعد بتتفرج على مسلسل وفيه اتنين متجوزين بيتخانقوا مثلاً وكل شوية ..
- يعني ايه تتكلمي مع راجل تاني وتخرجي معاه ؟ .. أنا مش قلتلك ميت مرة إن ..
= قطونيل ملمسه ناعم والأستك بتاعه بيعيش كتير .. قطونيل .. أصل القطن في مصر ..
- وليد صاحبي وأنا هو متعودين كل يوم نتكلم مع بعض .. ثم فيها ايه ما احنا امبارح لسه عاملين ..
= واحد .. وأمل واحد .. وحلم واحد بنحققه كلنا .. بنك القاهرة خدمة على مدار ٢٤ ساعة ..
- ده اسمه كلام فارغ .. من النهاردة مفيش خروج من البيت ولا كلام في التليفون .. ما هو أنا أصلي ..
= خدت في بورتو أكتوبر .. لو لسه مخدتش الحق فرصتك .. للحجز والإستعلام اتصل بـ ..
- لأ انسى .. الكلام بتاع زمان ده مش هايجيب نتيجة معايا .. وإذا كان أبوك كان اتعود يعمل كده مع ..
= أم حسن بتقدملك علب من بلاستيك مخصوص مقاوم للشوربة .. أم حسن .. أأمن أكل في مصر ..
- بقه كده .. طب ايه رأيك بقه إني مش هاسكت .. ولو عايزة توصليها لكده يبقى نتطلق .. نتطلق لكن مايتقالش عليا إني ..
= ببزوز كده .. ودحلاب دحلاب .. كل ما تشد فيه يطول ..
- أنا غلطانة إني رضيت بيك أصلاً .. النهاردة هارجع بيت أبويا وهو يبقى ..
= يتبرع لبنك الطعام .. أسر فقيرة مستنية منك أي حاجة ..
- لا يا شيخة .. خفت أنا من أبوكي .. طب انتي عارفة أصلا إن أبوكي ..
= بيعاني من مشاكل في الرضاعة .. لكن مع لبن نيدو صحته بقت أحسن وبقه بيطول كل يوم ..
- اخرس .. ما تقولش على بابا كده ..
- لأ هاقول .. وأيوه أبوكي قواد .. قواد ومشغل ..
= شبكة واحدة بتجمعنا كلنا ..
- اطلع بره .. بره مش عايزة أشوفك تاني .. واياك ترجع في يوم تقولي ..
= راح فين .. زمن الشقاوة .. يا حسين .. فاكر ولا ناسي ..
- هامشي .. بس قبل ما أمشي وعشان تبقي عارفة .. أنا قتلت وليد .. وليد مات ومن بكره هتلاقيه قدامك في إعلان بيبسي !