كنت في داون تاون التجمع ولفت انتباهي محل ملابس ايطالي شيك جدا بس جواه لقيت قطط كتير .. دخلت قلت اشوف ايه ده، لقيت صاحب المحل جايب كرسي وقاعد قدامهم سألته هيا القطط دي بتعمل بيها دعاية ولا ايه؟ قالي لاء دي امهم كانت بره هنا في المول وبعدين لقيتها عند باب المخزن جمب المحل ومعاها ولادها كانو لسه مولودين ومحتاسه بيهم عماله تنقلهم كل شوية في مكان .. المهم قال لعامل عنده بيبات في المخزن يدخلها تبات جوه معاه بس العامل جه في يوم قفل على ولادها وامهم بره فترة طويلة ومات واحد من الكتينز الصغيرين فطرده وراح مدخلهم جوا صالة العرض نفسها ... الغريب بقى انهم في صالة العرض بقالهم 3 شهور وبيرعاهم ويأكلهم ويفضل باصصلهم كده وهما بيلعبو ومش عارف يوديهم بيتو لان عندو 7 مربيهم هناك ... رغم ان في ناس بتعدي على المحل بتستلطف القطط .. بس في ناس كتير اكيد مش بتحب القطط ومش بتدخل عندو واكيد ده بيخسرو كتير .. بس عجبني جدا الموقف الانساني بتاعو، الراجل قالي نفسو حد يكون بيحب القطط ياخد منهم عشان يعيشو في بيت وبعدين حكالي على قط كان عنده ومات وراني صوره ولقيته بيعيط عليه واتأثر جدا .. الراجل ده ماشاء الله رغم انه صاحب براند وبزنس كبير واكيد بيخاف عليه .. بس الإنسانية والرحمة تنتصر على المال
2015-05-13, 12:41 pm
