السواق

2015-05-02, 7:35 pm

- الله يخربيت الثوره اللى وقفت حالنا ..

- معلش يااسطى اهى البلد رجعت لصحابها أبسط ياعم ومشى حالك بقى ..

- لسه بدرى ياأستاذ البلد مليانه ارهابيين ..بالك انت اول امبارح لسه قابضين على جارى ، راجل محترم ومؤدب وعمر ما طلعت من العيبه ..

- معلش متزعلش واديك معترف انه فيه ظلم اهو ..

- لا لا لا ظلم ايه ، هوه أكيد عمل حاجه ..

- ياعم ده انت لسه من 12 ثانيه قايل ان عمر ماطلعت منه العيبه ..!!!

- برضه مهما كان هما عارفين شغلهم كويس ، اكيد كان فى اجتماع كده خليه كده تنظيم دولى ، وممكن يكون ماسوني الله اعلم..

- طب يعنى ايه ماسونى يا اسطى ؟؟

- يعنى بيعبد الماسون ..

-...ء.!!!!

- مش عارفين والله كنا نعمل ايه من غيرهم افرض كان فجرنى انا وولادى وللا حاجه الحمد لله والله بحبهم وبدعيلهم اللى حامين البلد وبيخلونا ننام ف امان ، بالك انت الواحد من دول يتلطع فى الشمس ليل نهار والله انت ماتقدر تقف ف الشمس عشر دقايق ياأستاذ ولا حتى 5 دقايق..

- طبعا احنا اصلا فرافير جدا ياعمو ..

- ايه ده انت زعلت وللا ايه ؟؟

- ازاى بس ياراجل متقولش كده ده انت حتى راجل ظريف وخفيف ولازق ودمك يلطش ..

- يادى القرف لجنه ، معلش اربط الحزام ياأستاذ ..

________________________

- الرخص يا اسطى واركن على جنب ..

- ليه بس ياباشا عملت ايه ..؟؟

- رادار ..هتتصالح فورى وللا اعملك وصل ..؟؟

- بس ياباشا انا م ..

- خلص و بلاش كلام كتير ..

__________________________________

- ظلمه حسبى الله ونعم الوكيل فيهم شغل يوم بحاله راح مخالفه مرور ، خلاص القانون مقطع بعضه ، الله يرحم اما كنا عاملين لجان شعبيه عشان مكناش لاقيين ولا واحد منهم ..

تمت

سؤال البحث

نتائج البحث المساهمات المواضيع
وسم الكلمات الدليلية
بحث متقدم