البنت الشاطرة اللي كانت بتطلع الأولى على الدفعة اتجوزت وقعدت في البيت
و الولد اللي كان بيعيد السنة بقى اشطر دكتور في مصر
الولد اللي كان اجمل واحد في الجامعة تخن وبقى دمه تقيل
أحلى بنت في المدرسة لسه متجوزتش ومبسوطة واللي اتجوزت تعيسة
والبنت ام نضارة اللي كلنا بنقول عليها غلسة لبست لينسس واحلوت وبقت احلى بنت
الولد اللي كان عنده كرش بقى بيلعب رياضة وخس..واللي ذاكروا ودخلوا طب بيشتغلوا بفلوس قليلة وفي ناس مكملوش تعليمها بيقبضوا بالدولار
الولد اللي كانت امه بتحبه بقى يتيم عشان امه ماتت .
البنت اللي زعلت عشان صاحبتها اتجوزت وهي لأ اكتشفت ان جوز صحبتها بيضربها .. وان الضحك في الصور بس
الولد اللي كان جميل وغني وشاطر مات في حادثة .
وصاحبتك اللي بتقولي يابختها بجوزها طلع بيخونها وهي مطنشة او مش عارفه
البنت اللي كان كل اصحابها بيغيروا منها عشان بتدخل سباقات وتجيب ميداليات جالها ورم وبقت تتحرك بعكازات
الولد اللي كان عنده عربيه وسواق ودادا فلبينيه وفي مدرسة غاليه ابوه اتحبس وحياته اتغيرت تماماً .
حبيبك اللي قعدتي تعيطي عليه شهور وفاكراه سنين لو قابلتيه صدفه بعدها ممكن متسلميش عليه من كتر مابقاش فارق معاكي
صاحبك حبيبك اللي سافرتله من الساحل لمصر تحضر فرحه مجاش فرحك عشان نسي , وصاحبك اللي عمرك ماكان على بالك يبيعك عايرك بكل اسرارك
ربنا بيوزع علينا كلنا نصيبنا زي بعض ودوام الحال محال
#الحمد_لله
اللهم ارزقنا نعمة الرضا والحمد
2015-02-27, 2:19 pm
